NON VALE TODO PARA SER MELLOR
Esta frase
semella quizais demasiado obvia, máis ás veces parece mentira que teñamos que
lembrar o obvio. Hai un par de meses facíase viral o vídeo da final dos 60m obstáculos do Campionato de
Europa de atletismo en pista cuberta, onde o español Llopis, na loita polas
medallas, caía e daba coa cabeza contra o chan ficando inconsciente. Neses
momentos de preocupación por parte dos médicos atendéndoo in situ
contrastaba a reacción do gañador da proba -
e dalgúns dos outros rivais-, quen pasou xunto ao atleta tendido coma
un boneco e non só non fixo ademán de preocupación, senón que seguiu coas súas
celebracións por todo o alto.
Isto non é o
habitual no deporte, por sorte, xa que ante algunha desgracia allea moit@s
deportistas adoitan parar e preocuparse pol@ rival. Pero penso que ese vídeo merece unha
reflexión sobre algo tan obvio.
No caso concreto
do judo de competición os combates teñen unha intensidade moi alta, pero todos
eles acaban c@s 2 rivais facendo o saúdo seguindo a norma xaponesa, para logo
darse a man e mesmo abrazarse. Que toda a tempada nola xoguemos ás veces nunha
competición non debe ser escusa para perder o respecto e a preocupación pola
saúde do rival.
Na serie The Walking Dead en varios momentos da mesma dise que todos levamos unha máscara. Nunha
conversa, Lydia dille a Daryl que súa nai, Alpha, tiña razón cando dicía que
todos levamos máscaras e sorrimos, pero que cando chega un momento de pánico,
cada un mira polo seu e nos esquecemos dos demais. Os momentos de tensión ou
nervios non deben facernos esquecer que na vida e concretamente no deporte os
valores deben imperar sobre todo.
Nos adestramentos
de judo hai unha especie de código inherente á nosa arte marcial que consiste
en que se combatemos contra un/unha judoka cun cinto moito máis baixo que o
noso, temos que facer con moito coidado, nunca ao máximo e tratar de
aprenderlle cousas que lle poidan servir.
Por moito
traballo, dedicación e ilusión que haxa detrás dos nosos adestramentos, nunca
debemos esquecer que non todo vale para ser mellor.
M. Mallo
Comentarios
Publicar un comentario